Vladimir Putin i tha George Ë. Bushit se Ukraina ishte “pjesë e Rusisë” në vitin 2001, zbulojnë transkriptet e publikuara rishtazi. Në takimin e tyre të parë, udhëheqësi rus shprehu zhgënjim për rënien e Bashkimit Sovjetik, sipas arkivit të sigurisë kombëtare të SHBA-së. Duke i dhënë “një leksion të shkurtër historie” presidentit amerikan në samitin në Slloveni, Putin citohet të ketë thënë: “Çfarë ndodhi vërtet? Vullneti i mirë sovjetik ndryshoi botën. Dhe rusët hoqën dorë nga mijëra kilometra katrorë tokë, vullnetarisht. E padëgjuar. “Ukraina, pjesë e Rusisë për shekuj, u dha. Kazakistani, u dha. Kaukazi gjithashtu. E vështirë për t’u imagjinuar, dhe kjo u bë nga shefat e partisë”, tha Putin. Komentet u bënë në prill të vitit 2001, kur të dy presidentët kishin më pak se një vit në mandatet e para të tyre. Komentet sugjerojnë se Putini ka kohë që ka pasur ambicie për të pushtuar Ukrainën dhe do të nxisë shqetësimet se udhëheqësi rus mund të ketë plane ndaj Kazakistanit dhe Kaukazit përtej konfliktit të vazhdueshëm. Në përgjigje, Bush i tha Putinit se e shihte Rusinë si pjesë të Perëndimit dhe jo si një kundërshtar dhe e inkurajoi homologun e tij të "ripërcaktojë kërcënimet e reja që vijnë nga ata që e urrejnë Amerikën" dhe që mund ta urrejnë edhe Rusinë. Transkripti i deklasifikuar, i publikuar më 22 dhjetor, hedh dritë mbi qëllimet e Putinit ndaj shteteve fqinje dhe bie ndesh me komentet publike që Bush bëri në atë kohë. Pas takimit, presidenti Bush tha për Putinin: "E pashë në sy. Ishte shumë i drejtpërdrejtë dhe i besueshëm, arrita të kuptoja shpirtin e tij". Putini është mbështetur vazhdimisht në nostalgjinë sovjetike për të konsoliduar mbështetjen ruse për pushtimin e tij të Ukrainës, duke e paraqitur atë si një luftë kundër nazizmit. Në takimin e tij me Donald Trump në Alaskë, në gusht, i organizuar për të negociuar një marrëveshje të mundshme paqeje për Ukrainën, Putini mbajti gjithashtu një leksion të gjatë historik mbi pretendimet e supozuara të Rusisë ndaj Ukrainës. Diku tjetër në transkript, Putin ngriti mundësinë e bashkimit të Rusisë me NATO-n, duke thënë se Moska ndihej "e lënë jashtë" duke u përjashtuar nga aleanca. "Rusia është evropiane dhe shumëetnike, si Shtetet e Bashkuara. Mund të na imagjinoj duke u bërë aleatë", tha ai. "Në vitin 1954, Bashkimi Sovjetik aplikoi për t'u bashkuar me NATO-n. Unë e kam dokumentin – tha Putin duke shtuar se nato kishte dhënë përgjigje negative në atë kohë por tani, rusia i ka përmbushur kushtet.