Një gjykatë në Beograd dënoi në mungesë me 15 vite burg një ish-pjesëtarë të Ushtrisë Çlirimtare të Kosovës, nën akuzat e krimeve të luftës. Gjelosh Krasniqi është shpallur fajtor pasi Serbia e fajëson për vrasjen e tre personave dhe plagosjen e një civili në vitit 1999. Ngjarja sipas autoriteteve serbe ka ndodhur në fshatin Bellopojë afër Pejës. Fondi për të Drejtën Humanitare në Serbi ka thënë se aktakuza kundër Krasniqit bazohet kryesisht në deklarata të dëshmitarëve dhe prova të kufizuara forenzike dhe mjeko-ligjore dhe se avokati mbrojtës, sipas detyrës zyrtare, nuk kishte kontakt me të pandehurin. Kjo organizatë joqeveritare ka thënë se bashkëpunimi me institucionet gjyqësore të Kosovës është i domosdoshëm për ndjekjen penale të krimeve kundër serbëve në Kosovë. Serbia, përveç ngritjes së padive dhe gjykimeve në mungesë, ka vazhduar të ndalojë qytetarët e Kosovës në pikat kufitare. Për këto ngjarje ka reaguar edhe Komisioni Evropian që ka paralajmëruar Beogrdain se arrestimi dhe ndjekja penale e një shtetasi të Kosovës përfaqësonte një tjetër shkelje të detyrimeve të Serbisë sipas marrëveshjeve të arritura në kuadër të dialogut me Kosovën, me ndërmjetësim të Bashkimit Evropian në Bruksel.