Ursula Von der leyen njoftoi se Bashkimi Evropian do të zbatojë marrëveshjen gjigante tregtare me bllokun “Mercosur” të Amerikës së Jugut, ndërsa pret vendimin e gjykatës së lartë mbi ligjshmërinë e saj. “Komisioni tani do të vazhdojë me zbatimin e përkohshëm”, tha von der Leyen në Bruksel, duke kujtuar se shtetet anëtare i kishin dhënë fuqi ekzekutive të BE-së për ta bërë këtë. Por presidenti i Francës, Emmanuel Macron reagoi ashpër duke e cilësuar këtë një "sjellje të keqe" të Komisionit dhe e quajti këtë veprim një "surprizë të keqe" për Francën . "Komisioni Evropian ka marrë vendimin e njëanshëm për të zbatuar përkohësisht marrëveshjen me Mercosur, edhe pse Parlamenti Evropian nuk ka votuar për të. Kështu, ai po merr përsipër një përgjegjësi shumë të rëndë. Ne do të jemi të palëkundur në respektimin e këtyre rregullave, sepse Europa i ka shtrënguar rregullat për prodhuesit tanë vitet e fundit". Franca ka kundërshtuar sistematikisht marrëveshjen dhe është përpjekur pa sukses ta bllokojë atë për shkak të shqetësimeve për fermerët e saj, të cilët kanë frikë nga çmimi i mallrave më të lira që vijnë nga Brazili dhe fqinjët e tij.