Policia e Lezhës ka zbardhur aksidentin masiv të regjistruar mbrëmjen e djeshme në aksin rrugor Milot-Fushë Mamurras, ku u përfshi dhe mjeti shoqërues i eskortës së ish-kryeministrit Sali Berisha, i cili po kthehej nga Foltorja e Kurbinit. Nën hetim për këtë ngjarje është marrë 24-vjeçari nga Kosova, Ardi Mulliqi, pasi sipas bluve, ai ka qenë shkaktari i aksidentit duke bërë manovra të gabuara me mjetin e tij tip ‘Benz’. Burime zyrtare njoftojne se makina e Ardi Mulliqit ka goditur mjetin tjetër tip “Benz ” me drejtues një 28-vjeçar nga Tirana dhe ky i fundit ka goditur më pas mjetin shoqërues të Sali Berisha. Makina ku udhëtonte ish-kryeministri ka mundur të devijojë pa u aksidentuar. Të tre automjetet qarkullonin në një sens lëvizjeje, në korsinë e shpejtësisë. Si pasojë e aksidentit mbetën të lënduar, 24-vjeçari nga Kosova dhe dy pasagjerët që po udhëtonin bashkë me të. Pasi kanë marrë mjekim në spital,ata janë larguar për në banesë. Për këtë ngjarje reagoi edhe Ervis Tusha, truproja i Berishës i cili tha se shkak i aksidentit ishte 'Benz'-i i bardhë me targa kosovare.