Gjykata e Posaçme ka dënuar me 4 vite burgim ish-kryeprokurorin e Vlorës, Aurel Zarka, por në aplikim të gjykimit të shkurtuar do të vuajë 2 vite e 8 muaj burgim. Po ashtu ish kryeprokurorit të Vlorës I hiqet e drejta për ushtrimin e funksioneve publike për 5 vite. Akuzat që rëndojnë ndaj Zarkës janë ushtrimi i ndikimit të paligjshëm dhe korrupsioni. Ish kryeprokurori i Vlorës ka komunikuar përmes aplikacionit Sky Ecc me ish-oficeren Erjona Daupaj për të ndërhyrë në dosjen Toyota Auris, si dhe në dy çështje të tjera në qytetin bregdetar. Sipas SPAK, është provuar fakti se Aurel Zarka në bashkëpunim me Radovan Çelën, Astrit Vladin, Erjona Daupaj në bashkëpunim me njëri tjetrin në disa raste kanë ofruar dhe premtuar përfitime të parregullta për të ushtruar ndikim te funksionarë të drejtësisë; kanë pranuar premtime dhe përfitime të parregullta për të ushtruar ndikim të paligjshëm te funksionarë të drejtësisë; kanë ofruar përfitime të parregullta për funksionarë të drejtësisë; si dhe kanë kërkuar përfitime të parregullta për të kryer veprime të lidhura me funksionin dhe detyrën e tyre, sipas episodeve dhe akuzave respektive për secilin prej tyre.