Gjyqi ndaj një 51 vjeçari shqiptar që akuzohet për vrasjen e kunatit të tij në Greqi ka marrë një rrjedhë të papritur pas dëshmisë së vajzës 19 vjeçare të autorit. Fatmir Tarellari nga Poliçani akuzohet për vrasje me paramendim, pasi në janar të vitit 2024 i ngriti kurth kunatit të tij, i bindur se viktima kishte abuzuar seksualisht me të bijën. Por, e vërteta nuk është kështu. Vajza e tij 19 vjeçare ka pranuar para gjykatës në Greqi se ka mashtruar të atin duke i treguar disa mesazhe që kishte marrë në telefon nga i dashuri i saj. Ajo tha se skemën e mashtrimit e kishte ngritur për të bindur babanë e saj se paratë që i kishte dërguar për të paguar qiranë e banesës ja kishte dhënë dajës së saj, 33 vjeçarit Erjon Pelivani nga frika se ky i fundit do t’i bënte publike disa imazhe intime. E gjitha filloi kur 51-vjeçari Tarellari mori një telefonatë nga pronarja e vajzës së tij studente, e cila i tha se nuk e kishte paguar qiranë, edhe pse ai i kishte dërguar paratë rregullisht. Vajza 19-vjeçare pranoi se për t’u besuar nga i ati, ajo falsifikoi mesazhet SMS që shkëmbente me të dashurin e saj, në një mënyrë të tillë që dukej sikur dërguesi i mesazheve ishte 33-vjeçari, i cili në fund humbi jetën padrejtësisht.