Gjykata e Apelit të Tiranës ka caktuar datën kur do mbahet seanca për masën e sigurisë ndaj tre kontrollorëve të arrestuar disa kohë më parë pasi akuzohen si organizator të protestës në aeroportin e Rinasit. Kjo pasi kontrollorët apeluan vendimin e shkallës së Parë dhënë ndaj tyre. Tre kontrollorët, do dalin në gjykatë më 27 prill për të kërkuar një masë më të butë sigurie. Vetëm tre javë më parë, gjykata penale e Tiranës la në burg dy nga tre kontrollorët, Armando Fezgën dhe Muhin Mezinin. Ndërsa për Flora Ndrecën u caktua masa ‘Arrest shtëpie’ për shkak se kishte një fëmijë të mitur. Prokuroria ngriti ndaj tyre akuzën e shpërdorimit të detyrës si dhe nga deklarimet e tyre, është provuar se të tre ata, në bashkëpunim me njëri tjetrin, kanë ndikuar tek vartësit e tyre për të plotësuar formularin e paaftësisë në punë duke pretenduan se vuanin nga stresi që u ishte shkaktuar nga shkurtimi i rrogës prej pandemisë.. Po ashtu, me veprimet e tyre sollën mbylljen e kullës dhe aeroportit të Rinasit.