Prokuroria pranë Gjykatës së Shkallës së Parë të Juridiksionit të Përgjithshëm Sarandë ka përfunduar hetimet dhe ka dërguar për gjykim tre shtetas në lidhje me ngjarjen e rëndë të rrëmbimit të dy personave, të ndodhur në maj të vitit 2023. Sipas organit të akuzës, në gjyq janë dërguar Albi Mecini, i cili ndodhet aktualisht në burg, Sebastjan Lataj dhe Sofokli Baxherri. Albi Mecini akuzohet për veprën penale “Rrëmbimi ose mbajtja peng e personit”, Sebastjan Lataj për “Trafikimin e mjeteve motorrike”, ndërsa Sofokli Baxherri për “Deklarata të rreme përpara oficerit të policisë gjyqësore”, parashikuar nga nenet përkatëse të Kodit Penal. Hetimet lidhen me ngjarjen e ndodhur në maj të vitit 2023, kur u rrëmbyen shtetasit Leonard Theodhori dhe Fatmir Sulovari, të cilët prej asaj kohe rezultojnë ende të zhdukur. Prokuroria e Sarandës bën me dije se hetimet vijojnë për gjetjen e dy shtetasve të rrëmbyer, si dhe për zbardhjen e plotë të rrethanave të kësaj ngjarjeje dhe përfshirjen e personave të tjerë të dyshuar. Ngjarja e majit 2023 mbetet një nga çështjet më të rënda penale të trajtuara nga drejtësia në jug të vendit.