Në seancën e kësaj të marte për gjyqin “Gërdeci”, SPAK paraqiti listën e fundit të provave shkresore për ish ministrin e mbrojtjes Fatmir Mediu. Mes listës së provave është edhe faksi i dërguar nga Ministria e Drejtësisë drejt asaj të mbrojtjes me shënimin “Për Shkëlzenin”. Prokurori Arben Kraja rezervoi të drejtën për të pyetur në cilësinë e dëshmitares Anjola Agollin, ish sekretaren e Aldo Bumçit, ministër i Drejtësisë në kohën kur ndodhi ngjarja e rëndë. Organi i akuzës tha për gjykatën se e ka gjetur adresën e vendbanimit të Anjolës, e cila deri në këtë fazë nuk është pyetur në GJKKO. Seanca gjyqësore e radhës u caktua në datë 14 janar ora 09.00, teksa mungonte Fatmir Mediu, i cili u përfaqësua nga mbrojtësit e tij ligjorë. Në të njëjtën seancë, SPAK po ashtu rezervoi të drejtën edhe për paraqitjen e disa letërporosive me jashtë, që do t’u bashkohen provave ekzistuese në seancat e radhës.