Prokuroria Speciale njoftoi se ka ngritur aktakuzë ndaj ish-kryetarit të Komunës së Prishtinës, Shpend Ahmetit, për mosdeklarim pasurie. Nga hetimet e kryera rezulton se, Ahmeti - i cili shërbeu si kryetar i Prishtinës për dy mandatë, nga viti 2013 deri më 2021 - kishte paraqitur të dhëna të pasakata të pasurisë. “Sipas aktakuzës, shuma e përgjithshme e mjeteve të padeklaruara arrin vlerën prej 172,600.00 euro”, thuhet në njoftimin e Prokurorisë Speciale, që bëri të ditur se rasti tashmë ka kaluar për shqyrtim në Gjykatën Themelore në Prishtinë. Deklarimi I pasurisë është një nga kushtet për të gjithë personat publikë në Kosovë që nga viti 2007. Ligji për deklarimin e pasurisë i obligon zyrtarët e lartë publikë që ta deklarojnë pasurinë e tyre 30 ditë nga marrja e postit të ri, dhe pastaj në baza vjetore. Mosdeklarimi i pasurisë, sipas Kodit Penal të Republikës së Kosovës, dënohet me gjobë ose me burgim deri në tre vjet, ndërsa deklarimi i rremë i pasurisë është i dënueshëm me gjobë dhe me burgim nga gjashtë muaj deri në pesë vjet.