Gjykata e Durrësit la në burg pronarin dhe shoferin e kamionit ku u sekuestruan 45,5 kg heroinë. Arrestimi i pronarit të kompanisë së transportit Arian Çerma dhe shoferit të kamionit Olgert Duda u vlerësua i ligjshëm nga gjykata e cila caktoi masën e sigurisë arrest në burg për të dy të akuzuarit. Nga hetimet e kryera rezulton se për të kaluar drogën pa u vënë re nga autoritetet e kontrollit doganor e kufitar, të arrestuarit në bashkëpunim me njëri-tjetrin kanë përdorur skemën e zëvendësimit të kokës së kamionit, duke sajuar një defekt, pasi i tërë kamioni kishte kaluar më parë kontrollin e skanerit. Në kokën zëvendësuese të kamionit fshihej dhe sasia e drogës e përgatitur për t'u trafikuar me traget drejt Italisë. Gjatë arrestimit në kushtet e flagrancës Arian Çerma dhe Olgert Durda kanë mohuar se ishin në dijeni për sasinë e drogës në kamion. Task Forca që operon në Portin e Durrësit, ka ushtruar një kontroll të imtësishëm në kamionët në hyrje dhe në dalje. Gjatë një kontrolli në dalje në vijën e dytë, në kamionin tip “Scania” i ngarkuar me krom, me destinacion shtetin Italian, u gjetën të fshehura 43 pako të mbështjella me natriban brenda të cilave kishte lëndë narkotike të dyshuar heroinë, me peshë totale 45 kilogramë e 500 gramë.