Një operacion Policisë Italiane në Piza ka çuar në sekuestrimin e një sasie të konsiderueshme kokaine dhe arrestimin e një 31-vjeçari shqiptar. Shqiptari u kap, teksa forcat e rendit po kryenin kontrolle të zakonshme trafiku. Vëmendjen e policisë e tërhoqi një automjet që lëvizte në mënyrë të dyshimtë, duke ndjekur rrugë dytësore, një manovër që shpesh përdoret për të shmangur patrullat e policisë. Pas ndalimit të mjetit, oficerët vunë re sjelljen e dyshimtë dhe nervozizmin e drejtuesit të makinës, i cili nuk ishte në gjendje të jepte një shpjegim të arsyeshëm për destinacionin apo itinerarin e ndjekur. Gjatë kontrollit të automjetit, u zbulua edhe një distinktiv magnetik pa shenja dalluese identifikuese, objekt që shtoi më tej dyshimet e policisë. Pas kontrolleve të tjera oficerët zbuluan një sistem të fshehur elektronik në brendësi të panelit të kontrollit të makinës. Përmes një karte magnetike, aktivizohej një mekanizëm që hapte një ndarje të padukshme, ku u gjetën gjashtë blloqe kokaine me një peshë totale prej 5.9 kilogramësh. Hetimet vijuan edhe në banesën e të arrestuarit, ku u sekuestruan rreth 6,800 euro në para të gatshme dhe pajisje që shërbenin për përpunimin dhe paketimin e drogës. Autoritetet italiane kanë nisur procedurat ligjore ndaj të dyshuarit, ndërsa hetimet vijojnë për të zbuluar rrjetin e mundshëm të përfshirë në trafikun e lëndës narkotike.