Dashnor Dumani, vëllai i të penduarit të drejtësisë Nuredin Dumani, i cili akuzohet nga SPAK për përfshirje në masakrën e Bradasheshit në dhjetor 2018, ku mbetën të vrarë tre persona, si dhe për pjesëmarrje në grabitjen spektakolare në pistën e aeroportit të Rinasit është lënë në masën e sigurisë arrest me burg. Ndërkohë, masa e sigurisë për Armis Stafën është lehtësuar, duke kaluar nga “arrest në burg” në “arrest shtëpie”. Ai dyshohet se ka pastruar para për organizatën kriminale të vëllezërve Hajdar dhe Franc Çopja, përmes transaksioneve të shit-blerjes së automjeteve. Të dy të dyshuarit u ekstraduan nga Emiratet e Bashkuara Arabe të mërkurën dhe zbarkuan në aeroportin e Rinasit nën masa të rrepta sigurie. Dashnor Dumani është i dënuar më herët për armëmbajtje pa leje dhe akuzohet për një sërë veprash të rënda penale. Armis Stafa ishte në arrati në Dubai deri në arrestimin e tij nga autoritetet vendase.