Një fluturim i American Airlines u evakuua në Aeroportin Ndërkombëtar të Denverit pasi përjetoi një "problem mekanik" që lidhej me një gomë, gjatë ngritjes. Videot e postuara në mediat sociale, tregonin pasagjerët që evakuoheshin nga avioni përmes daljeve të emergjencës, me flakë dhe tym që dilte nga poshtë trupit të avionit. Sipas kompanisë që operon Aeroportin Ndërkombëtar të Denverit, një person u dërgua në spital pas incidentit. "Fluturimi 3023 përjetoi një problem mekanik gjatë ngritjes," tha linja ajrore në një deklaratë. "Të gjithë pasagjerët dhe ekuipazhi zbritën në mënyrë të sigurt dhe avioni u nxor jashtë shërbimit për inspektim nga ekipi ynë i mirëmbajtjes. Ne falënderojmë anëtarët e ekipit tonë për profesionalizmin e tyre dhe u kërkojmë falje klientëve tanë për këtë incident", përfundonte deklarata. Administrata Federale e Aviacionit po heton tani aksidentin. Sipas kompanisë ajrore, në bordin e avionit kishte 173 pasagjerë dhe gjashtë pjesëtarë të ekuipazhit Evakuimi është më i fundit në një varg incidentesh alarmante të aviacionit në Aeroportin Ndërkombëtar të Denverit, që është edhe aeroporti i gjashtë më i ngarkuar në botë. Një aksident që përfshinte një avion të American Airlines ndodhi në aeroport në mars kur një avion pësoi një "problem në motor" dhe bëri ulje emergjente.