Departamenti i emigracionit në Turqi ka bërë të ditur se 45 refugjatë do të dëbohen nga vendi për shkak të videove që konsiderohen provokuese të shpërndara në mediat siociale. “Janë transferuar në qendra për deportim dhe gjenden aktualisht nën mbikqyrje administrative”, thuhet në një komunikatë të departamentit që nuk tregon ndërkohë kombësinë e personave që do të dëbohen. Sipas shtypit ndërkombëtar, bëhet fjalë për sirianë. Refugjatët e ndaluar janë identifikuar si autorë të postimeve në mediat sociale, ku bëhej ironi për një qytetar turk që akuzonte emigrantët sirianë se jetonin në kushte shumë të mira ndërkohë që turqit vuanin për shkak të vështirësive ekonomike. Vecanërisht, në fund të tetorit, ishte bërë virale një video në të cilën shihej një qytetar turk që kritikonte një refugjate siriane në treg, ku ajo po blinte banane. “Unë nuk mund të blej as edhe një banane ndërsa ti po blen një kile të tërë”, thotë burri me ton akuzuës. Duke reaguar ndaj eventit u shpërndanë në mediat siciale disa video refugjatësh sirianë që ironizonin ngjarjen në të cilat vetë ata hanin banane.