Presidenti amerikan Donald Trump e klasifikoi fentanilin si një armë të shkatërrimit në masë, duke intensifikuar kështu fushatën e administratës së tij kundër karteleve të drogës në Amerikën Latine. "Asnjë bombë nuk bën atë që po bën fentanili, 200 deri në 300,000 njerëz vdesin çdo vit", tha Trump gjatë nënshkrimit të një urdhri ekzekutiv që e vendoste fentanilin në të njëjtën kategori me armët bërthamore dhe ato kimike. Por, ndryshe nga pretendimi i Trump për vdekjet nga fentanili, Qendrat e SHBA-së për Kontrollin dhe Parandalimin e Sëmundjeve raportuan një total prej rreth 80,000 vdekjesh nga mbidoza në vend në vitin 2024, me rreth 48,000 prej tyre për shkak të opioideve sintetike. Urdhri ekzekutiv tha se "fentanili i paligjshëm është më i ngjashëm me një arme kimike sesa me një narkotik", dhe se prodhimi dhe shpërndarja e tij "kërcënon sigurinë kombëtare dhe nxit paligjshmërinë në hemisferën e veriut dhe në kufijtë e amerikës". Klasifikimi i fentanilit lidhet me luftën e administratës Trump kundër "narko-terroristëve" të dyshuar, e cila ka përfshirë një fushatë ushtarake që synon anijet e dyshuara për kontrabandë droge me sulme që kanë lënë gati 90 persona të vdekur që nga fillimi i shtatorit. Por, ndërsa Trump pretendon se çdo anije e shkatërruar, dhe ka pasur më shumë se 20 të tilla, shpëton 25,000 jetë amerikane, anijet mendohet se transportojnë kokainë në vend të fentanilit shumë më vdekjeprurës, i cili kryesisht hyn në Shtetet e Bashkuara nga Meksika dhe jo me anije nga Kolumbia ose Venezuela. Trump i ka shoqëruar sulmet me një grumbullim masiv ushtarak në Karaibe që përfshin aeroplanmbajtësen më të madhe në botë dhe një mori anijesh të tjera luftarake, ndërsa një varg avionësh ushtarakë amerikanë kanë fluturuar përgjatë bregdetit të Venezuelës në javët e fundit. Ndërsa Trump dhe administrata e tij thonë se objektivi i grumbullimit ushtarak është trafikimi i drogës, udhëheqësi i majtë i Venezuelës, Nicolas Maduro, akuzon Uashingtonin se përdor kontrabandën e narkotikëve si pretekst për ndryshimin e regjimit në Karakas. Shtetet e Bashkuara janë përpjekur t’i lidhin të dy çështjet, duke akuzuar Maduron se udhëheq të ashtuquajturin “Kartel të Diejve”, të cilin e shpalli një organizatë “narkoterroriste” muajin e kaluar, dhe duke ofruar një shpërblim prej 50 milionë dollarësh për informacionin që çon në kapjen e presidentit venezuelian.