Presidenti amerikan Donald Trump thotë se Rusia ka rënë dakord për një marrëveshje për t'i dhënë fund konfliktit në Ukrainë, me Presidentin Volodymr Zelensky që tani po pengon. "Unë mendoj se kemi një marrëveshje me Rusinë. Duhet të arrijmë një marrëveshje me Zelenskin," u tha Trump gazetarëve në Zyrën Ovale. "Mendova se mund të ishte më e lehtë të merresha me Zelenskin. Por deri më tani kjo ka qenë më e vështirë”, tha Trump. Më herët ai kishte pohuar se një marrëveshje me Rusinë për ndalimin e luftës në Ukrainë ishte "shumë afër", por kritikoi presidentin ukrainas Volodymyr Zelensky për refuzimin e tij për t'i dorëzuar zyrtarisht Krimenë Rusisë. "Janë deklaratat nxitëse si ato të Zelenskit që e bëjnë kaq të vështirë përfundimin e kësaj Lufte," tha Trump në një postim në Truth Social. Shpërthimi erdhi pasi raportet e mediave amerikane thanë se Trump ishte gati të pranonte njohjen e Krimesë së aneksuar si territor rus dhe pasi zëvendëspresidenti JD Vance tha se shkëmbimi i tokës do të ishte thelbësor për çdo marrëveshje. Në postimin e tij, Trump i referohej komenteve të Zelenskit, të botuara në Ëall Street Journal të mërkurën, në të cilat ai tha se dhënia e Krimesë është kundër kushtetutës së Ukrainës. “Ukraina nuk do ta njohë ligjërisht pushtimin e Krimesë”, citohet të ketë thënë Zelenski. "Nuk ka asgjë për të folur këtu". Trump kritikoi Zelenskin për këto komente. "Kjo deklaratë është shumë e dëmshme për negociatat e paqes me Rusinë," tha Trump, duke shtuar se nëse Ukraina "do Krimenë, pse nuk luftuan për të njëmbëdhjetë vjet më parë, kur ajo iu dorëzua Rusisë pa shkrepur as edhe një armë?" "Deklarata e bërë nga Zelensky sot nuk do të bëjë gjë tjetër veçse të zgjasë tmerrin e vrasjeve dhe askush nuk e dëshiron këtë!" "Ne jemi shumë afër një marrëveshjeje, por njeriu që nuk ka më asnjë kartë në dorë, duhet ta pranojë atë" – shkroi trump.