Qindra punonjës të Zërit të Amerikës dhe Radio Evropa e Lirë u pezulluan me pagesë të shtunën dhe fondet për dy agjencitë amerikane të lajmeve u shkurtuan, një ditë pasi Presidenti Donald Trump nënshkroi urdhrin ekzekutiv për reduktime shpenzimesh në gjashtë agjenci. Urdhri përfshin edhe Agjencinë Amerikane për Median Globale, që administron dhe financon Zërin e Amerikës dhe Radio Evropa e Lirë. Punonjës të Zërit të Amerikës, një transmetues mediatik ndërkombëtar që operon në më shumë se 40 gjuhë thanë se email-i që kishin marrë i vendoste ata në leje administrative me paga dhe përfitime të plota "deri në një njoftim të dytë". Në lidhje me vendimin ka reaguar përmes rrjeteve sociale edhe Elez Biberaj, që drejtoi për vite me radhë byronë shqiptare të Zërit të Amerikës. “Zëri i Amerikës, një fener shprese dhe të vërtetë për qindra miliona anembanë globit, u hesht në emër të reduktimit të burokracisë federale”, shkroi ai. Për më shumë se tetë dekada, Zëri i Amerikës ka promovuar idealet demokratike të Amerikës duke shërbyer si një burim i besueshëm lajmesh të për miliona njerëz në rajone të privuara nga informacioni i lirë dhe i pavarur.