Presidenti Donald Trump kërcënoi të shtunën se do të vendoste një tarifë prej 30% për importet nga Meksika dhe Bashkimi Evropian duke filluar nga 1 gushti, pas javësh negociata me partnerët kryesorë tregtarë të SHBA-së që dështuan të arrinin një marrëveshje gjithëpërfshirëse tregtare. Në një përshkallëzim të një lufte tregtare që ka zemëruar aleatët e SHBA-së dhe ka tronditur investitorët, Trump njoftoi tarifat e fundit në letra të ndara drejtuar Presidentes së Komisionit Evropian Ursula von der Leyen dhe Presidentes meksikane Claudia Sheinbaum, të cilat u postuan në faqen e tij të mediave sociale Truth të shtunën. BE dhe Meksika, të dyja ndër partnerët më të mëdhenj tregtarë të SHBA-së, u përgjigjën duke i quajtur tarifat të padrejta dhe shkatërruese, ndërsa u zotuan të vazhdonin të negocionin me SHBA-në për një marrëveshje më të gjerë tregtare. Presidentja meksikane Claudia Sheinbaum tha se ishte e sigurt se mund të arrihet një marrëveshje. "Gjithmonë kam thënë se në këto raste, ajo që duhet të bësh është të ruash qetësinë për t'u përballur me çdo problem", tha ajo. "Gjithashtu jemi të qartë se mund të bashkëpunojmë me qeverinë amerikane por jemi të qartë edhe për atë që nuk mund të bëjmë. Dhe ka diçka që nuk është kurrë e negociueshme: sovraniteti i vendit tonë", tha presidentja e meksikës. Trump u dërgoi letra të ngjashme 23 partnerëve të tjerë tregtarë këtë javë, përfshirë Kanadanë, Japoninë dhe Brazilin, duke vendosur tarifa të përgjithshme që variojnë nga 20% deri në 50%, si dhe një tarifë prej 50% për bakrin. Vala e letrave tregoi se Trump është rikthyer në qëndrimin agresiv tregtar që mori në prill kur njoftoi një mori tarifash reciproke kundër partnerëve tregtarë që i çuan tregjet në kaos, para se Shtëpia e Bardhë të shtynte zbatimin.