Presidenti i SHBA Donald Trump tha se ai priste homologun e tij ukrainas Volodymyr Zelensky në Uashington për të firmosur marrëveshjen për mineralet e rralla të Ukrainës, poasi të dy liderët shkëmbyen komente të forta për njëri-tjetrin. Pa konfirmuar se një marrëveshje ishte arritur, Trump tha të martën se në këmbim të marrëveshjes Ukraina do të merrte "të drejtën për të luftuar". "Ata janë shumë të guximshëm," u tha ai gazetarëve, por "pa Shtetet e Bashkuara dhe paratë e tyre dhe pajisjet e tyre ushtarake, kjo luftë do të kishte përfunduar në një periudhë shumë të shkurtër kohore". I pyetur nëse furnizimet me pajisje dhe municione amerikane në Ukrainë do të vazhdojnë, ai tha: "Ndoshta derisa të kemi një marrëveshje me Rusinë... Ne duhet të kemi një marrëveshje, përndryshe do të vazhdojë." Do të kishte nevojë për "një formë paqeruajtjeje" në Ukrainë pas çdo marrëveshjeje paqeje, shtoi Trump, por kjo do të duhej të ishte "e pranueshme për të gjithë".Trump pretendon se kjo marrëveshje do të bënte që SHBA të merrte më shumë se sa kishte shpenzuar për Ukrainën, por më shumë detaje thuhet se duhet të zbulohen në vijim. Raportet sugjerojnë se do të krijohej një fond në pronësi të përbashkët, i cili do të përdoret për të rindërtuar infrastrukturën dhe ekonominë e Ukrainës. Ukraina do të kontribuojë në fond me 50% të të ardhurave të ardhshme nga burimet shtetërore minerale, nafta dhe gazi - dhe më pas fondi do të investojë në projekte në vetë Ukrainën. Të martën, Trump tha se SHBA i kishte dhënë Ukrainës midis 300 dhe 350 miliardë dollarë. "Ne duam t'i kthejmë ato para," tha ai. "Ne po e ndihmojmë vendin përmes një problemi shumë të madh... por taksapaguesit amerikanë tani do të marrin paratë e tyre mbrapsht", tha ai.