Një shpërthim me tritol është raportuar mbrëmjen e sotme në aksin rrugor Fushë Krujë-Tiranë, pranë fshatit Arameras. Ngjarja ka ndodhur në ambientet e jashtme të një objekti, që përdorej si mobileri nga shtetasi Desar Cengu, banues në fshatin Larushk të Fushë Krujës. Forcat e policisë kanë mbërritur menjëherë në vendngjarje, teksa janë ngritur edhe grupe kontrolli për identifikimin dhe kapjen e autorëve. Policia bën me dije se nuk ka njerëz të prekur nga shpërthimi, që gjithsesi ka shkaktuar dëme të shumta materiale, me fasadën e mobilerisë, të shkatërruar komplet, ashtu siç duket edhe në pamjet e siguruara nga Top Neës. Në vendngjarje ka mbërritur edhe grupi hetimor, që po punon për të zbardhur dinamikën e ngjarjes dhe për të gjetur elementë që mund të sjellin në identifikimin e autorëve. Gjithashtu po merret në pyetje edhe pronari i mobilerisë, në lidhje me ndonjë konflikt të mundshëm që mund të ketë pasur dhe që mund të ndihmojë në ngritjen e pistave të hetimit.