Kosta Trebicka ishte emri që u lakuar për shumë kohë në media. Madje tejkaloi edhe kufirin shqiptar, teksa u kërkua ekspertizë amerikane. Ky është procesverbali i regjistrimit të procedimit penal i referuar që në veprimet e para “Shkelje e Rregullave të Qarkullimit Rrugor”. Klasifikimi juridik ngeli i tillë deri në fund, kur u pushuan hetimet. “Por ai e ka parë që këtu kemi të bëjmë me aksident thotë ai, nëse nuk do ishte aksident dhe nuk dilnin llogaritjet do thoshim jo: skemi të bëjmë me aksident por dicka tjetër që se përcaktojmë dot”. A mund të ishin intimiduar hetuesit dhe ekspertët nga nxitimi i Sali Berishës për ta klasifikuar ngjarjen aksidentale? Dyshimet ishin të mëdha. Interesi i ish-kryeministrit për çështjen ishte i madh. Eksperti Gëzim Hoxha pretendon të kundërtën. ”Jo absolutisht jo, askush sna ka bërë presion për ekspertizën na kanë thënë merrni të dhënat e këto e nxirrni cfarë ka ndodhur aty”. Gëzim Hoxha, është një prej 3 ekspertëve autoteknikë të cilët në raportet e tyre e mbyllën hetimin e ngjarjes si aksidentale. “Po patjetër, i qëndroj ekspertizës, se vë në diskutim, ajo ashtu ka ndodhur, e kam bindje të plotë. Sepse të gjitha veprimet matematikore që bëra, më dalin që makina është përmbysur, më dalin llogaritjet që makina ka ndaluar, pra më përputhet mendimi me veprimet e tjera të kryera” . Kjo është skica e kqyrjes së vendgjarjes. Aty, pasqyrohen të gjitha gjurmët e gomave dhe sendet e gjetura. Rreth 95 metër nga kryqëzimi me rrugën Lekas-Voskopojë, që merret si pikë referimi, fillon një gjurmë rrëshqitjeje me gjatësi 9.8 metër. Në mesin e rrugës së hapur rishtazi, me një kurriz në mes kemi ndërprerje të gjurmës. Ajo shfaqet sërish me një gjatësi 1.9 metër. Në fund të kësaj gjurme janë shenjat e një manovre të menjëhershme të prerjes së timonit në të majtë.