Policia ka finalizur me sukses operacionin e koduar ‘Klienti’, ku ka kapur dy shpërndarës lëndësh narkotike dhe 800 gramë kokainë. Në prangat e policisë ka rënë një 35 vjeçar nga Dibra dhe një 33 vjeçar nga Tirana. Sipas njoftimit të policisë 35 vjeçari nga Dibra është person me rezikshëmri të lartë, pasi ishte në kërkim për veprat penale "Vrasja me paramendim” mbetur në tentativë dhe "Armëmbajtja pa leje". Sipas policisë 35 vjeçari nga Dibra me anë të lidhjeve të tij shoqërore siguronte sasi të mëdha lënde narkotike të llojit kokaine, të cilën ia jepte më pas 33 vjeçarit nga Tirana që ta shiste në doza të vogla, te klientë të ndryshëm në kryeqytet, me sasi nga 100 gramë deri në 1 kg, kundrejt vlerës 45 euro për gram. Policia ka ndërhyrë kur dy të arrestuarit ndodheshin tek zona e "21 Dhjetorit". Gjatë kontrollit fizik të ushtruar atyre iu gjet një sasi me rreth 800 gramë lëndë narkotike kokainë, e cila u sekuestrua në cilësinë e provës materiale, së bashku 1 aparat celular dhe një automjet që autorët e përdornin për shpërndarjen e lëndës narkotike.