Prej ditësh qytetarët janë organizuar në protestë për të kundërshtuar rritjen e çmimeve të naftës dhe produkteve të tjera të shportës. Por, pas këtyre protestave ka vepruar edhe policia, duke shoqëruar shumë prej atyre personave, që sipas saj, kanë bllokuar lëvizjen e automjeteve, kanë penguar kryerjen e detyrës nga punonjësit e policisë së shtetit, apo prishur rendin dhe qetësinë publike. Në harkun kohor të tre ditëve të protestës janë shoqëruar në polici mbi 35 persona, të cilët këtë të dielë u përballën me gjykatën e Tiranës, e cila mori në shqyrtim vlerësimin e masës së sigurisë ndaj tyre. Kësisoj, rreth 35 persona, të cilët u shoqëruan në komisariat për rezistencë ndaj efektivë të policisë, janë lënë të lirë këtë të dielë. Në seancën gjyqësore që u zhvillua me dyer të mbyllura, Gjykata e Tiranës vendosi masën e sigurisë ‘Detyrim Paraqitje’ për 35 të arrestuarit. E njëjta gjë ndodhi edhe me protestuesit e qyteteve të tjera, të cilët po ashtu u arrestuan nga policia dhe më pas u liruan, duke lënë për ta si masë sigurie vetëm paraqitjen në policinë gjyqësore për hetimet e mëtejshme. Kjo e dielë shënon ditën e pestë të protestave, ndonëse një ditë më parë, pati një ulje të çmimit të naftës, e ndikuarkjo nga qeveria, e cila vendosi një çmim tavan. Qytetarët do të vijojnë të grumbullohen e të marshojnë përpara kryeministrisë deri sa të arrijnë objektivin e tyre. Ata kanë pakënaqësi me cmimet, ndërsa kanë bërë thirrje pa ndalur për grumbullim edhe më masiv në të gjithë vendin.