Tirana është zgjuar sot e mbuluar nga bora. Ashtu sic ishte paralajmëruar që më herët nga sinoptikanët, reshjet e borës që kanë përfshirë thuajse të gjithë territorin e vendit, nuk kanë kursyer këtë radhë edhe kryeqytetin, ku dëbora shihet rrallë. E kjo ka sjellë mbi të gjitha gëzim tek fëmijët e kryeqytetit, që janë derdhur nëpër rrugë e parqe, për të shijuar borën e parë pas shumë vitesh në Tiranë, që i ka dhënë po ashtu një hijeshi të vecantë edhe ditës së të dashuruarve, shën Valentinit. Reshjet e borës në kryeqytet nisën pasditen e të shtunës dhe vijuan gjatë gjithë natës. Ato pushuan rreth orës 04.00 të mëngjesit të sotëm, duke i lënë vendin tani temperaturave të ulëta. Meteorologët nuk parashikojnë reshje të tjera bore gjatë ditës, por ekziston frika se bora e rënë, në temperaturat e ulëta që pritet të vijojnë, të ngrijë, duke shkaktuar probleme. Sidoqoftë, autoritetet e qytetit duket se kanë marrë masa, pasi punonjësit e pastrimit të rrugëve kanë larguar borën nga trotuaret, në mënyrë që të minimizojnë rreziqet e rrëshqitjeve për qytetarët. Dita e hënë pritet të jetë akoma më e ftogtë dhe sipas parashikuesve të motit temperaturat gjatë natës do të ulen si jo zakonisht nën zero pavarësisht se do të kalojmë ditë me diell.