Një nga zyrat elektorale të Partisë Socialiste është sulmuar gjatë natës së kaluar në qytetin e Beratit. Bëhet e ditur se mëngjesin e së martës, anëtarë të kësaj zyre kanë shkuar aty, por kanë konstatuar se dera e jashtme ishte thyer, pasi ishte qëlluar me gurë. Më pas ata kanë lajmëruar policinë, e cila ka mbërritur në lagjen “30 Vjetori”, anës rrugës ku ndodhet dhe zyra. Grupi hetimor ka shkuar në vendin e ngjarjes ku ka sekuestruar pamjet filmike të kamerave të sigurisë së kësaj zyre. Këto pamje mund të ndihmojnë në zbulimin e personit apo personave që mund të kenë sulmuar zyrat e selisë rozë. Gjithashtu bëhet me dije se janë sekuestruar edhe gurët që janë gjetur në vendin e ngjarjes, pasi në to mund të ketë edhe gjurmë gishtërinjsh të autorëve. Nga ana e Partisë Socialiste në qytetin e Beratit, nuk ka bërë ende një reagim në lidhje me këtë ngjarje. Më herët janë sulmuar edhe zyrat e PS-së në qytetin e Fierit.