Liderët e Shteteve të Bashkuara të Amerikës, Kanadasë, Francës, Gjermanisë, Italisë dhe Britanisë së Madhe ritheksuan përkrahjen e tyre për Izraelin dhe të drejtën e tij për t’u vetëmbrojtur, por, po ashtu, i bënë thirrje atij që të respektojë ligjin ndërkombëtar humanitar dhe të mbrojë civilët. Në një deklaratë të përbashkët për luftën e Izraelit me grupin militant, Hamas, liderët mirëpritën lirimin e dy pengjeve nga Hamasi, si dhe bënë thirrje për lirimin e menjëhershëm të të gjitha pengjeve të tjera. Presidenti amerikan, Joe Biden, ishte ai që thirri takimin virtual me liderët e vendeve të Quint-it, SHBA, Francë, Gjermani, Britani e Madhe, Itali dhe Kanada, pasi kishte biseduar me kryeministrin e Izraelit, Benjamin Netanyahu. Apeli i tyre erdhi pas rritjes së frikës se lufta mes Izraelit dhe Hamasit mund të përhapet në një konflikt të gjerë në Lindjen e Mesme, ndërkohë që Izraeli vazhdon bombardimet ndaj Gazës dhe përplasjet në kufirin libanez janë intensifikuar. Në deklaratë, Biden, kryeministri kanadez Justin Tredeau, presidenti francez Emmanuel Macron, kancelari gjerman Olaf Scholz, kryeministrja italiane Giorgia Meloni dhe kryeministri britanik Rishi Sunak, u angazhuan se do të punojnë së bashku për të mbështetur qytetarët e tyre në rajon, vecanërisht ata të cilët duan të largohen nga Gaza. Ata përshëndetën dërgimin e autokolonave të para me ndihma humanitare në Gazë dhe nënvizuan se do të punojnë me partnerët rajonalë për të garantuar “akses të sigurt dhe të qëndrueshëm” në ushqim, ujë, kujdes mjekësor dhe ndihma tjera humanitare për 2.3 milionë banorët e Gazës.