Të paktën 32 persona kanë humbur jetën nga rrëshqitjet e dheut dhe përmbytjet e shkaktuara nga shirat e rrëmbyeshëm në shtetin brazilian të Minas Gerais. Dy qytetet më të prekura janë Juiz de Fora, ku 12 shtëpi u rrëmbyen nga një rrëshqitje dheu, dhe Ubá, ku një lumë doli nga shtrati. Ekipet e shpëtimit po kërkojnë të paktën 38 persona që ende rezultojnë të zhdukur dhe po ngrihen strehimore për mijëra njerëz të pastrehë. Meteorologët thonë se reshjet e shiut që kanë rënë deri më tani në rajon këtë muaj janë tashmë dyfishi i mesatares së pritur për shkurtin dhe parashikohen më shumë reshje për ditët në vijim. Një banor i Ubá-s, Lucas Gandra, i tha BBC Brasil se kishte marrë paralajmërimin e parë për përmbytje në orët e para të mëngjesit sipas orës lokale të së martës, kur një mik e telefonoi për t'i thënë se lumi ishte gati të shpërthente. Qyteti, i cili ndodhet 300 km në veri të Rio de Janeiros, u godit nga përmbytjet në vitet 2019 dhe 2020, por sipas Gandrës, këto përmbytje nuk ishin aq shkatërruese sa ajo aktuale. «Pashë njerëz që ishin bllokuar në shtëpitë e tyre duke qarë për ndihmë dhe nuk kishte asgjë që mund të bënim», thotë ai. "Kishte një shtëpi në veçanti, ku sinqerisht mendova se do të na duhej të shihnim njerëzit brenda duke u mbytur.", shtoi më tej.