Forcat kubane vranë katër mërgimtarë kubanezë dhe plagosën gjashtë të tjerë që lundruan në ujërat e ishullit në bordin e një motoskafi të regjistruar në Florida të mërkurën dhe hapën zjarr ndaj një patrulle, tha qeveria, në një kohë tensionesh të shtuara me Shtetet e Bashkuara. Ministria e Brendshme e Kubës tha se grupi përbëhej nga mërgimtarë kubanë antiqeveritarë, disa prej të cilëve ishin të kërkuar më herët për planifikim sulmesh. Ata vinin nga Shtetet e Bashkuara me uniforma kamuflazhi dhe të armatosur me armë sulmi, pistoleta, eksplozivë artizanalë, jelekë antiplumb dhe mjete për të shikuar natën, tha Kuba. Një i dyshuar tjetër kuban u ndalua brenda territorit të ishullit në lidhje me komplotin, tha deklarata. "Sipas të dhënave paraprake, ata kishin ndërmend të kryenin një infiltrim për qëllime terroriste," tha Ministria e Brendshme. Të plagosurit u evakuuan dhe morën kujdes mjekësor, ndërsa komandanti i patrullës kubaneze u plagos gjithashtu, tha ministria. Sekretari amerikan i Shtetit Marco Rubio, u tha gazetarëve se nuk ishte një operacion i SHBA-së dhe se asnjë personel i qeverisë amerikane nuk ishte i përfshirë. Autoritetet kubaneze njoftuan SHBA-të për incidentin, por ambasada amerikane në Havana do të përpiqet të verifikojë në mënyrë të pavarur se çfarë ndodhi, tha Rubio.