Tetë persona u plagosën kur një 45-vjeçar thirri "Palestina e Lirë" dhe hodhi pajisje ndezëse mbi një turmë në Boulder të Kolorados, ku po zhvillohej një demonstratë në kujtim të pengjeve izraelite që mbeten në Gaza, thanë autoritetet. Katër gra dhe katër burra mes moshës 52 dhe 88 vjeç u transportuan në spitale, tha policia e Boulder. Autoritetet thanë më herët se të plagosurit ishin gjashtë dhe se të paktën një prej tyre ishte në gjendje kritike. "Si rezultat i këtyre fakteve paraprake, është e qartë se ky është një akt dhune i shënjestruar dhe FBI po e heton këtë si një akt terrorizmi", tha agjenti special i FBI-së Mark Michalek. Ai e identifikoi autorin e dyshuar si Mohamed Soliman, i cili u shtrua në spital menjëherë pas sulmit. Drejtori i FBI-së, Kash Patel, e përshkroi gjithashtu incidentin si një "sulm terrorist të shënjestruar", dhe Prokurori i Përgjithshëm i Kolorados, Phil Ëeiser, tha se dukej të ishte "një krim urrejtjeje duke pasur parasysh grupin që ishte vënë në shënjestër". Shefi i Policisë së Boulderit, Stephen Redfearn, tha se nuk besonte se dikush tjetër ishte i përfshirë.