Me zërin e dridhur, dukshëm përfshirë nga emocionet e një ditë aspak të zakonshme për Kosovën, Hashim Thaçi lexoi deklaratën e shpalljes së pavarësisë së Kosovës. Asokohe kryeministër, Thaçi do të rrënjoset thellë në histori, duke e kthyer ish-udhëheqësin e UÇK në një simbolet e epokës së re, që po trokiste në vend. Por 14 vite më vonë, ndërkohë që Prishtina feston me parada madhështore këtë ditë të lavdishme, Thaçi e gjen veten në paraburgim në Hagë, në pritje të gjykimit për një akuzë të rënde, atë për krime lufte. Edhe pse figura më e rëndsishme që ka mbizotëruar në politikën e Kosovës që nga përfundimi i luftës, asnjë nga zyrtarët e lartë në Kosovë nuk e përmendi në 17 shkurtin e këtij viti Thaçin për rolin e tij në shpalljen e Pavarësisë. Dukshëm politika e Kosovës ka marrë nuancat e një konflikti politik mes atyre që janë në qeveri, dhe partive në opozitë, ndonëse rotacioni politik në vendin që ka vetëm 14 vjet shtet ka qenë i shpeshtë. I lindur në vitin 1968 në një familje fermerësh në fshatin Burojë në luginën e Drenicës, Thaçi ishte udhëheqës i Drejtorisë Politike, një nga pozitat më të larta në UÇK, për t’u bërë më pas udhëheqësi i saj.