Departamenti amerikan i Drejtësisë dërgoi në një gjykatë federale në Virxhinia organizatorin e dyshuar të sulmit të gushtit të vitit 2021 ku u vranë 13 ushtarë të Shteteve të Bashkuara në Afganistan. Departamenti i Drejtësisë tha se ndaj anëtarit të grupit ‘Shteti Islamik Khorasan’, Mohammad Sharifullah, i njohur me nofkën “Jafar”, është ngritur aktakuzë më 2 mars. Sipas Zërit të Amerikës ai akuzohet se ka “ofruar mbështetje për një organizatë të shpallur terroriste, duke shkaktuar vdekje”. Lajmin për kapjen e Sharifullahut e dha Presidenti Donald Trump gjatë fjalimit të martën në mbrëmje para dy dhomave të Kongresit. “Kam kënaqësinë të njoftoj se sapo kemi kapur një nga terroristët kryesorë që është përgjegjës për krime”, tha Presidenti Trump. “Ai do të përballet me drejtësinë amerikane”. Nga sulmi i ndodhur në aeroportin ndërkombëtar Hamid Karzai në Kabul krahas ushtarëve amerikanë u vranë dhe afro 170 afganë. Grupi ‘Shteti Islamik Khorasan’ apo ISIS-K, organizatë që ka lidhje me Shtetin Islamik, mori përgjegjësinë për sulmin.