Një 40-vjeçar është vënë në pranga nga Policia e Lushnjës, në bashkëpunim me efektivët e Komisariatit Sarandë, pasi ishte shpallur në kërkim për një vepër penale të rëndë. Roberton Cerria u arrestua pasi dyshohet se më datë 6 korrik ka tentuar të kryejë marrëdhënie seksuale me dhunë ndaj një gruaje 35-vjeçare, në banesën e saj. Për këtë ngjarje, ndaj 40 vjeçarit ishte lëshuar një urdhër ndalimi për veprën penale “Marrëdhënie seksuale me dhunë me të rritura, mbetur në tentativë”. Ndërkohë, në një rast tjetër shërbimet e Policisë së Fierit kanë ndaluar Olsi Dukën ndaj të cilit ishte vendosur masa e sigurisë “Arrest në burg”, për veprën penale “Vjedhja”. Ai akuzohet se, në bashkëpunim me një person tjetër të arrestuar më herët, ka vjedhur katër motomjete elektrike dhe sende të tjera nga një biznes në fshatin Savër. Të dy të ndaluarit janë vënë në dispozicion të Prokurorisë për veprime të mëtejshme hetimore.