Në muajin dhjetor, emisioni investigativ “Top Story” publikoi një skemë të strukturuar të ngritur nga fondacione apo institucioneve financiare, jo banka, ku shumë njerëz kishin rënë viktima e kredive të marra. Këto institucione blejnë kreditë e këqija të bankave apo dhe të institucioneve të tjera dhe më pas i detyrojnë kredimarrësit me të gjitha format, përfshi edhe anti-ligjore, që të marrin një kredi të re për të shlyer të vjetrën. Madje u bëjnë presion atyre dhe të afërmve që të shlyejnë sa më parë kamatat që shkojnë në disafish më të shtrenjta, sesa borxhi fillestar që ka marrë qytetari. Gjatë kësaj kohe edhe Prokuroria ka ngritur një hetim të posaçëm për të gjithë këtë aferë gjigande, duke iu bashkuar një hetimi të Bankës Qendrore të nisur disa muaj përpara se të transmetohej emisioni. Por duket se fenomeni ende vazhdon, të paktën nga disa raste që raportohen pranë Qendrës “Konsumatori Shqiptar”, e cila në një letër dërguar autoriteteve kërkon ndërprerjen një herë e mirë të këtyre praktikave ekstra-ligjore në kurriz të qytetarëve. Gjithashtu kjo qendër u bën thirrje autoriteteve që të mbikëqyrin bankat e nivelit të dytë dhe organizmat e tjera financiarë të licencuar nga Banka e Shqipërisë.