Gjykata e Lartë refuzoi kërkesën e Monika Kryemadhit për kthimin e telefonit të sekuestruar nga SPAK në kuadër të hetimeve që Prokuroria e Posaçme ka nisur ndaj saj dhe Ilir Metës si pjesë e të paktën katër kallëzimeve që janë depozituar në këtë prokurori. Telefoni, që burimet thonë se është sekuestruar në banesën e të ëmës së Kryemadhit është bllokuar nga SPAK në kuadër të dosjes së lobimit të Lëvizjes Socialiste për Integrim në SHBA. Në këtë dosje, SPAK po heton dyshimet se LSI ka paguar nga viti 2014 deri në vitin 2018 të paktën 700 mijë dollarë për të influencuar te politikanë dhe anëtarë të kongresit amerikan. Në kallëzimin e depozituar për këtë dosje dyshohen akuzat e korrupsionit dhe fshehjes së pasurisë. Monika Kryemadhi kërkoi më herët heqjen e masës së sekuestros në shkallën e parë të gjykatës së posaçme dhe në apel. Në të dyja rastet, gjykatat lanë në fuqi vendimin e kërkuar nga ana e prokurorisë së posaçme.