Gjykata Kushtetuese e konsideroi të paligjshëm mbylljen e TikTok një vit më parë nga Qeveria. Gjykata thotë se masa ka cenuar lirinë e shprehjes dhe të shtypit pas padisë së ngritur nga dy shoqata gazetarësh. Sipas vendimit të gjykatës, qëllimi për mbylljen e platformës për të mbrojtur fëmijët është i mirëpritur, por mjeti i zgjedhur për ta bërë atë përmes një vendimi qeveri është i gabuar. Gjykata thotë se mbyllja me VKM bie ndesh me kriterin kushtetues që kufizimet e lirisë së shpreshjes vendosen vetëm me ligj. Gjykata vlerësoi se masa nuk përmbushi as kriterin e proporcionalitetit, pasi bllokimi i plotë i platformës preku edhe të rriturit, jo vetëm fëmijët. Kryeministri Edi Rama reagoi përmes rrjeteve sociale pas këtij vendimi, duke përmendur se 90 për qind e prindërve dhe mësuesve kërkuan mbylljen e TikTok. Ai thotë se platforma u rihap pas mirëkuptimit që Shqipëria gjeti me kompaninë. “Të ishte për Gjykatën Kushtetuese, s’do ishte mbyllur fare dhe as masat pozitive s’do ishin arritur dot’, shkruan Rama, duke shtuar se ky vendim i gjykatës do të nxisë shpifësit.