65-vjeçari, i cili u gjet pa jetë në afërsi të lumit Mat mbrëmjen e së premtes dyshohet se ka vdekur si pasojë e përplasjes nga një automjet, që më pas është larguar. Ekspertiza mjeko-ligjore, që u krye në Tiranë përcaktoi se plagët në trupin e viktimës me inicialet Gj.T., që ka qenë duke kullotur bagëtitë, nuk janë shkaktuar as nga një armë zjarri, as thike dhe as goditje me sende të forta. Dyshohet se hematomat në trupin e tij janë pasojë e përplasjes së shkaktuar nga një automjet dhe më pas goditjeve që ka pësuar tek pemët anës rrugës, pranë vendit ku u gjet pa shenja jete. 65-vjeçari është banor i fshatit Pllanë në Lezhë dhe zhdukjen e tij e denoncoi e bija që mori në telefon policinë për ta njoftuar se ai nuk përgjigjej në telefon. Nga këqyrja paraprake u dyshua se në trupin e tij kishte plagë të shkaktuara nga armë zjarri. Dyshimet u përforcuan pasi në të shkuarën gjykatat kishin miratuar tre urdhëra mbrojtje ndaj të birit, përkatësisht në vitin 2020, 2022 dhe 2023.