Vijojnë kontrollet intensive në të gjitha rrugët e vendit, ku sërish gjatë 24 orëve të fundit janë konstatuar shumë drejtues mjetesh që abuzojnë me shpejtësinë, alkolin, me përdorimin e celularit në timon apo me mos përdorimin e rripit. Për pasojë, në pranga janë vënë 11 drejtues mjetesh dhe motomjetesh. 6 prej tyre u vunë në pranga pasi ishin pa leje drejtimi dhe 5 të tjerë për drejtim mjeti në gjendje të dehur. Në njoftimin zyrtarë të policisë së shtetit, gjithashtu bëhet me dije se janë pezulluar 39 leje drejtimi, nga të cilat 23 për shpejtësi mbi normat e lejuara deri në 162 km/orë në rrugën interurbane Tiranë-Elbasan, 12 për drejtim mjeti nën efektin e alkoolit dhe 4 për qarkullim në sens të kundërt. Uniformat blu bënë me dije se 1 mijë e 445 drejtues mjetesh janë ndëshkaur me masë administrative në të gjithë vendin, për shkelje të ndryshme që sjellin pasoja të rënda në rrugë.