Të ardhurat shtesë që u grumbulliuan përgjatë vitit të kaluar nga TVSh-ja, si efekt i drejtpërdrejt i rritjes së çmimeve u përdorën për të shlyer borxhin. Të dhënat e Ministrisë së Financave tregojnë se borxhi publik u ul në 68.8 për qind në fund të vitit 2022, nga 74.5 për qind që arriti në 2020, vitin e parë të pandemisë. Shifrat dalin te dokumenti i kuadrit makroekonomik 2024-2026. Arkëtimet në vitin e kaluar u rritën me 13 për qind, ose 588 milionë euro më shumë. Të ardhurat shtesë u përdorën edhe si ndihmë për bizneset dhe kategoritë sociale në nevojë. Borxhi publik bruto gjithsesi mbetet në nivele më të larta se para pandemisë 2019 ku treguesi arriti në 65.8% të PBB-së.