Kur shpërtheu debati në fund të vitit të kaluar në lidhje me tatimin e të vetëpunësuarve, Ministria e Financave u tërhoq duke sugjeruar se do ta rishikojë draftin me qëllim miratimin e tij brenda gjysmës së parë të këtij viti. Por, drafti që ndodhet aktualisht në sirtaret e ministrisë nuk ka dallim thelbësor nga propozimi i dhjetorit të vitit të kaluar, me përjashtim që shtyhet hyrja në fuqi për më 1 janar të vitit të ardhshëm. Drafti parashikon që të vetëpunësuarit do të tatohen në dy shkallë, 15 dhe 23 për qind. Konkretisht për fitim deri në 14 milionë lekë, tatimi do të arrijë në nivelin e 15 për qind, ndërsa për të vetëpunësuarit me fitim mbi 14 milionë lekë, tatimi do të jetë 23 për qind. Në varësi të aktivitetit të të vetëpunësuarve, atyre do t’u njihen 30 deri në 90 për qind të xhiros totale si shpenzime.