Autokolona rreth 65 km e gjatë që është parë prej ditësh të gjarpërojë drejt kryeqytetit Ukrainës Kiev, është ndalur në fakt pa ndonjë avancim të dukshëm. Zyrtarët britanikë thonë se kolona e trupave dhe municioneve ka bërë shumë pak progres prej më shumë se tre ditësh dhe tani ajo duket e bllokuar 30 km larg Kievit. Ministria e mbrojtjes së ukrainës tha se autokolona ishte ndalur nga rezistenca e vendosur e trupave të vendit, problemet mekanike dhe bllokimi. Ekspertët ndërkohë thonë se moti i lagësht dhe i ngrohtë duhet fajësuar po ashtu për ngecjen e tankeve. Një mot si jo zakonisht i ngrohtë ka bërë që fushat që duhet të ishin të ngrira në këtë kohë të vitit, të mbushen me baltë dhe një mjet që peshon 20 ton, mund të zhytet deri në 40 centimetra në baltë duke bllokuar edhe shumë të tjerë pas tij. Madje disa ekspertë kanë thënë edhe se kur trupat janë përpjekur ti nxjerrin nga balta mjetet e rënda, të blinduara, zinxhirët apo gomat e tyre kanë shpërthyer për shkak të mirëmbajtjes së munguar. Zyrtarët amerikanë të sigurisë thonë se kjo do ti lërë autokolonat ruse të ekspozuara ndaj trupave ukrainase. Tanket dhe kamionët e rëndë të ushtrisë po sulmohen ndërkohë edhe nga luftëtarët e rezistencës që përdorin armë britanike anti tank, NLAË dhe raketa amerikane Javelin. Por në anën tjetër, sa më gjatë që autokolona qëndron e bllokuar, aq më e madhe është frika se vladimir Putin do ti drejtohet takikave akoma më mizore në këtë luftë të tijën.