Shërbimi sekret amerikan tha se ka ndaluar shoferin e një kamioncine të marrë me qera që u përplas mbi barrierat e sigurisë afër Shtëpisë së Bardhë, mbrëmjen e të hënës, nën dyshimin se mund të ketë qenë një akt i qëllimshëm ndërsa sqaroi se nuk kishte patur të lënduar dhe as nuk kishte një rrezik në vijim. Një dëshmitar okular tha për agjencinë e lajmeve Reuters se hetuesit kishin gjetur një flamur me zvastikën naziste që kishte rënë nga kamioncina, që u përplas me barrierat në sheshin Lafayette, pranë oborrit të Shtëpisë së Bardhë. “Hetimet paraprake tregojnë se shoferi mund të ketë përplasur qëllimisht mjetin me barrierat e sigurisë”, tha shefi i komunikimeve i shërbimit sekret amerikan. Policia lokale po ashtu do të angazhohet në hetimin e mëtejshëm. Televizionet transmetuan pamje nga aksidenti, ku shihej makina e përplasur mbi rrethim dhe oficerët e policisë përreth. Ndërsa në mediat sociale është postuar edhe një video e momentit të përplasjes në të cilën shihet kamioncina që i drejtohej barrikadave. Pasi u përplas herën e parë, shoferi i godet barrierat edhe një herë tjetër. Nuk dihet se ku ndodhej presidenti Biden në momentin e ngjarjes. Ai takoi liderët e kongresit në shtëpinë e bardhë më herët, mbrëmjuen e të hënës. Ndërkohë një hotel pranë shtëpisë së bardhë, u evakuua me kërkesë të shërbimit sekret.