Ekipi i Top Channel në veri të Kosovës është përballur me akte vandale dhe dhunë verbale prej protestuesve serbë. Makina e medias më të madhe shqiptare është sulmuar nga protestues me kapucc e të maskuar. Ata i kanë hequr targat, si dhe kanë shkruar mbi automjet simbole nacionaliste serbe e ruse. Gjithashtu, vandalët serbë kanë hedhur edhe bojë të zezë mbi xhamin e përparmë të automjetit. Agresorët kanë vepruar pa asnjë provokim nga ana e ekipit të Top Channel, që ndodhet në veri të Kosovës për të raportuar mbi ngjarjet e fundit atje dhe përshkallëzimin e tensioneve. Megjithëse, KFOR dhe forcat e policisë janë të pranishme në zonë, kjo nuk i ka ndaluar ata të kryejnë akte sulmuese mbi automjetet pranë komunave apo të tentojnë të hyjnë me forcë brenda në institucione.