Sulmet kibernetike ndaj shërbimeve publike online dhe faqeve qeveritare, janë kryer me po të njëjtën metodologji si sulmet në Ukrainë, Gjermani, Holandë apo edhe vende të tjera europiane. Në njoftimin e kryeministrisë, thuhet se këto lloj sulmesh kibernetike maskohen fillimisht me sulme të tipit Ransomware, me anë të të cilave hakerat kërkojnë të largojnë vëmendjen nga qëllimi real, që është sulmi ndaj sistemeve kritike. Hapi i dytë i këtij sulmi të përqendruar dhe sofistikuar është goditja në sistemet kritike dixhitale të shtetit shqiptar për t’i nxjerrë jashtë funksionit.