Presidenti ukrainas Volodymyr Zelensky tha se Suedia është 'më e mbrojtur' pasi vendi u bashkua me NATO-n ndërkohë që presidenti rus, Vladimir Putin ka qëndruar i heshtur pas lëvizjes historike. Zelensky përshëndeti anëtarësimin e Suedisë, duke thënë: "Një vend tjetër në Evropë është bërë më i mbrojtur nga e keqja ruse". "Tani, në një kohë të agresionit rus kundër gjithçkaje që e ka bërë Evropën paqësore dhe të bashkuar, të gjithë e shohin se sa e rëndësishme është të ruajmë aleancat dhe partneritetet, të forcojmë sigurinë tonë dhe të kujdesemi për sigurinë e fqinjëve," shtoi ai. U deshën thuajse dy vjet përpjekje politike dhe një luftë deklaratash me shumë shtete anëtare, për të mos përmendur një seri kërcënimesh nga Vladimir Putin, përpara se Suedia të anëtarësohej zyrtarisht në NATO duke u shkëputur kështu nga një politikë e hershme e saj e neutralitetit ushtarak. Çuditërisht, Putin ka heshtur deri më tani, pavarësisht pranimit të Suedisë dhe Finlandës, e cila ndan një kufi 1,340 km të gjatë me Rusinë, që përbën një goditje të rëndësishme për presidentin rus. Ai ka kërkuar me këmbëngulje të ndalojë çdo forcim të mëtejshëm të aleancës së NATO-s dhe ka kërcënuar më herët se do të marrë 'kundërmasa politike dhe ushtarako-teknike' të paspecifikuara në përgjigje të lëvizjes së Suedisë. Maria Zakharova, një zëdhënëse e Ministrisë së Jashtme ruse, ka deklaruar më herët se Moska do të monitorojë nga afër se çfarë do të bëjë Suedia në bllokun ushtarak agresiv, si do ta realizojë në praktikë anëtarësimin e saj…dhe mbi këtë bazë do të ndërtojë përgjigjen e saj me hapa të natyrës ushtarako-teknike . “Anëtarësimi i Suedisë në NATO shoqërohet me nxitjen e vazhdueshme të histerisë anti-ruse në vend, që për fat të keq, inkurajohet nga lidershipi politik dhe ushtarak suedez, por burimi kryesor i saj është jashtë vendit. Nuk janë vetë suedezët ata që po e bëjnë zgjedhjen; kjo zgjedhje është bërë për suedezët' – tha ajo. I shtyrë nga pushtimi rus i Ukrainës në shkurt 2022, kombi skandinav dhe partneri i tij nordik Finlanda bënë një rishikim gjithëpërfshirës të politikës së tyre të hershme të sigurisë kombëtare dhe vetëm dy muaj më vonë aplikuan për t'u bashkuar me bllokun e madh. Njëzet e dy muaj më vonë, kryeministri suedez Ulf Kristersson dorëzoi dokumentacionin përfundimtar në një ceremoni të udhëhequr nga Sekretari amerikan i Shtetit Antony Blinken, pas së cilës 'instrumenti i pranimit' i Stokholmit në aleancë u depozitua zyrtarisht në Departamentin e Shtetit.