Gjykata Europiane e Të Drejtave të Njeriut në Strasburg ka rrëzuar çështjen e ngritur nga ish-Gjyqtarja e Gjykatës Kushtetuese, Altina Xhoxhaj, e cila ngriti padi në këtë institucion ndërkombëtar për vendimin e vettingut që e shkarkoi si gjyqtare. Xhoxhaj është e para gjyqtare e shkarkuar nga vettingu në Shqipëri, që i merret në shqyrtim ankesa në Strasburg për procesin e vettingut. Ish gjyqtarja pretendonte se mënyra e zhvillimit dhe gjykimit nga strukturat e vettingut të çështjes së saj ka shkelur të drejtat e njeriut. Por Strasburgu i ka thënë ‘Jo’ duke shpjeguar se shkarkimi i saj ishte korrekt dhe i bazuar në ligj. Aktualisht në Gjykatën Evropiane të të Drejtave të Njeriut, janë 20 ankesa gjyqtarësh dhe prokurorësh të shkarkuar nga Vettingu. Xhoxhaj ka pretenduar para trupës gjykuese ndërkombëtare për një seri shkeljesh gjatë procesit të Vetingut, përfshirë të drejtën për një proces të rregullt ligjor, e zhvilluar nga një trupë e pavarur, e paanshme dhe e aftë për detyrën. KPK e shkarkoi gjyqtaren në mars të vitit 2018, vendim që u la në fuqi në tetor të po atij viti nga KPA.