Fushata e kandidatëve për deputetë në rrjetet sociale gjatë këtyre tridhjetë ditëve do jetë nën monitorimin e komisionit qëndror të zgjedhjeve, ku janë caktuar tre specialistët që do filtrojnë qoftë financimin e fushatës online po ashtu edhe keqpërdorimin e profileve zyrtare të institucioneve publike në rrjetet sociale. Sipas të dhënave të kompanisë META, në 90 ditët e fundit është shpenzuar një shumë e konsiderueshme parash në Facebook për të sponsorizuar aktivitetin e kandidatëve për deputet. Në vend të parë qëndron Agron Shehaj i cili ka shpenzuar afërisht 22 mijë dollarë, ndjekur nga Jorida Tabaku me rreth 11 mijë dollarë, Endrit Shabani 3 mijë dollarë, Endri Hasa rreth 3 mijë dollarë dhe Vullnet Sinaj afërsisht 1 mijë dollarë. Komisioni Qëndror i Zgjedhjeve do monitorojë jo vetëm reklamat politike, por edhe financimin e tyre kur është e mundur nga palë të treta pasi në vitin 2021 janë identifikuar jo pak raste kur fushata online është financuar nga palë të treta me llogari dhe profile anonime. Do monitorohen aktivitete të ndaluara sikurse është regjistrimi i spoteve apo videove në vendin e punës për mbështetjen e një kandidati, keqpërdorimi i profileve zyrtare të institucioneve publike apo edhe rastet e narrativave në lidhje me fakte të pavërteta ndaj procesit zgjedhor.