Ministrat e Mbrojtjes të NATO-s takohen të enjten para samitit të madh vjetor që do të mbahet më 24 dhe 25 qershor, kur 32 krerët e shteteve të aleancës ushtarake, përfshirë presidentin amerikan, Donald Trump, do të mblidhen në Hagë. Takimi ka të bëjë vetëm me një gjë: paratë. Në këtë takim zyrtarët pritet të bien dakord për objektivin e ri të shpenzimeve të NATO-s. Teksa shumica e anëtarëve të aleancës tani shpenzojnë 2 për qind të Prodhimit të Brendshëm bruto për mbrojtjen, objektivi i radhës është 3.5 për qind, apo shpenzim për kapacitete ushtarake sic janë tanket, raketat dhe municionet. Sipas zyrtarëve të NATO-s, vetëm Spanja ka problem me objektivin prej 3.5 për qindësh, por pritet të bëjë kompromise në takimin ministror. Spanja është një nga pak shtetet që ende nuk përmbush pragun e shpenzimeve prej 2 për qindësh, duke arritur vitin e kaluar në vetëm 1.28 për qind dhe rritja e shpenzimeve ushtarake që ishte parashikuar, duket se është bllokuar për momentin. Objektivi prej 3.5 për qindësh nuk është çështja e vetme që kërkon një vendim. Po ashtu duhet të ketë një objektiv shpenzimesh prej 1.5 për qindësh në atë që mund të cilësohet si objektiv i butë, duke bërë që totali i shpenzimeve të arrijë në 5 për qind të Prodhimit të Brendshëm Bruto.