Prokuroria e Posaçme njofton se përgjatë vitit të kaluar ka kërkuar masa sigurimi për 629 persona nën hetim, nga të cilat masa e arrestit me burg është kërkuar për 236 persona në total. Në vlera totale, thotë SPAK, përgjatë vitit të kaluar janë vetëm 32 persona të akuzuar për korrupsion për të cilët ka kërkuar masën e sigurisë arrest me burg, duke zënë 5 për qind të totalit të masave. Arrest me burg është kërkuar në masë të madhe për personat e akuzuar për grup të strukturuar kriminal, me 194 masa të tilla, ose gati 31 për qind të totalit të masave të sigurisë. SPAK është akuzuar për ashpërsinë e masave të sigurisë, ndërsa në një reagim të mëhershëm, prokuroria e posaçme u referohet të dhënave nga Drejtoria e Përgjithshme e Burgjeve. SPAK thotë se nga të dhënat, numri i personave të hetuar nga prokurorët e posaçëm, ndaj të cilëve ka masë sigurie arrest me burg është 9.7 për qind e totalit të të paraburgosurve, që janë 2791 të tillë. Pjesa prej mbi 2500 të paraburgosurish, sipas statistikave të publikuara nga SPAK janë persona që janë nën hetim nga prokuroritë e rretheve dhe ajo e Tiranës, përfshirë ato të apelit. SPAK dhe GJKKO janë akuzuar ditët e fundit se nuk zbatojnë masat alternative të sigurisë ndaj personave që ka nën hetim.