Ekipi ligjor i kryebashkiakut të Tiranës Erion Veliajt ka reaguar ashpër ndaj asaj që e cilëson si një praktikë të përsëritur dhe të paligjshme të nxjerrjes së informacioneve konfidenciale nga hetimet, duke akuzuar SPAK për shkelje të sekretit hetimor dhe ndikim të qëllimshëm në opinionin publik. Sipas avokatëve të tij, lajmet e publikuara në media për një takim të mundshëm mes mbrojtjes dhe SPAK-ut, si dhe njoftimi i pritshëm i akuzës ditën e merkurë janë provë se organi i akuzës po përdor metoda jo ligjore për të ndikuar në perceptimin publik mbi fajësinë e Veliajt. “Zbulimi i përsëritur dhe i paligjshëm i informacioneve që përbëjnë sekret hetimor mbi çështjen e z. Veliaj ka vijuar pa ndërprerje që nga dita e arrestimit të tij, në një përpjekje të qëllimshme për ta paragjykuar”, thuhet në deklaratën e ekipit të tij ligjor. Ata shtojnë se mosndërmarrja e asnjë veprimi nga SPAK për ndjekjen penale të autorëve të këtyre zbulimeve është dëshmi e bashkëpunimit institucional në këtë shkelje. Kryebashkiaku i Tiranës kundërshton çdo akuzë dhe e cilëson ndalimin e tij si të pajustifikuar dhe në dëm të interesit publik. Ai thekson se qyteti i Tiranës ka nevojë për drejtimin e zgjedhur dhe legjitim të kryetarit, dhe se ndalimi i tij po dëmton rëndë funksionimin e institucionit dhe të drejtave të qytetarëve.